काठमाण्डौ । अमेरिकी सहायता परियोजना मिलेनियम च्यालेन्ज कर्पोरेशन (एमसीसी) पुनः कार्यान्वयनको चरणमा प्रवेश गरेको छ।
नेपाल सरकारलाई साउन ८ गते (जुलाई २४, २०२५) मा एमसीसीले पठाएको पत्रअनुसार अमेरिकी राष्ट्रपतिको कार्यकारी आदेशअनुसार भएको परियोजना पुनरावलोकन प्रक्रिया औपचारिक रूपमा समाप्त भएको छ। अर्थ मन्त्रालयका अनुसार अब एमसीसी परियोजना कार्यान्वयनमा कुनै अवरोध नरहने स्पष्ट संकेत आएको छ।
पत्रमा नेपालमा एमसीसी परियोजनाको कार्यान्वयनलाई निरन्तरता दिन स्पष्ट सिफारिस गरिएको उल्लेख छ।
नेपाल सरकार र एमसीसीबीच २०७४ भदौ २९ गते सम्झौता भएको थियो। सम्झौता अनुसार नेपालमा विद्युत् प्रसारण लाइन निर्माण र सडक स्तरोन्नति जस्ता पूर्वाधार परियोजनाहरू सञ्चालन गर्ने सहमति भएको थियो।
तर सन् २०२५ को सुरुवातमा अमेरिकी राष्ट्रपति कार्यालयबाट परियोजना पुनरावलोकनमा राख्ने निर्णय भएपछि परियोजना केही समयका लागि स्थगित भएको थियो।
हाल पुनरावलोकन प्रक्रिया टुंगिएपछि नेपाल कम्प्याक्ट अन्तर्गतका कार्यहरू फेरि अगाडि बढ्ने अर्थ मन्त्रालयले जनाएको छ।
