काठमाण्डौ । चितवन राष्ट्रिय निकुञ्जमा नियन्त्रणमा लिइएका बाघ पाल्न बजेट अभाव भएको छ। निकुञ्जको विभिन्न खोरमा राखिएका सात बाघको हेरचाह र आहाराका लागि आवश्यक बजेट नहुँदा समस्या भएको हो।
निकुञ्जको कसरामा तीन, सौराहामा दुई र देवनगरमा दुई गरी हाल सात बाघ खोरमा राखिएका छन्। मानव बस्तीमा पसेका, बिरामी वा आक्रामक व्यवहार देखाउने बाघलाई नियन्त्रणमा लिएर खोरमा राख्ने गरिन्छ।
निकुञ्जका सूचना अधिकारी अविनाश थापामगरका अनुसार सात बाघको मासु खुवाइ तथा हेरचाहका लागि वार्षिक झण्डै ३० लाख रुपैयाँ खर्च लाग्छ। तर सरकारले बाघका लागि वार्षिक पाँच लाख रुपैयाँ मात्र छुट्याउँदै आएको छ। “गत आर्थिक वर्षमा मात्रै २२ लाख बराबरको मासुको भुक्तानी गर्न बाँकी छ,” थापामगरले जानकारी दिए।
उनका अनुसार एउटा बाघलाई दैनिक पाँचदेखि सात किलोसम्म राँगाको मासु आवश्यक पर्छ। मासिक खर्च दुई लाख रुपैयाँभन्दा बढी हुने भए पनि निकुञ्जले नियमित मासु खुवाइरहेको छ।
थप बाघ राख्ने ठाउँ नहुँदा निकुञ्जले केही बाघलाई अन्यत्र सार्नु परेको छ। गत वर्ष एक बाघ पर्सा राष्ट्रिय निकुञ्ज पठाइएको थियो।
पछिल्लो तथ्यांकअनुसार चितवन राष्ट्रिय निकुञ्जमा १२८ वयस्क पाटे बाघ छन्। आहारा प्रजाति बढेसँगै बाघको सङ्ख्या पनि वृद्धि भएको हो।
