काठमाण्डौ । सिडिएस एण्ड क्लियरिङ लिमिटेड (सीडीएससी) को नयाँ प्रस्तावप्रति स्वतन्त्र ऊर्जा उत्पादकहरूको संस्था नेपाल (इप्पान) ले कडा आपत्ति जनाउँदै तत्काल फिर्ता लिन माग गरेको छ।
सीडीएससीले संस्थापक समूहको शेयरका लागि छुट्टाछुट्टै ISIN नम्बर दिने प्रस्ताव नेपाल धितोपत्र बोर्डमा पठाएको छ। इप्पानले उक्त प्रस्ताव कार्यान्वयन भएमा पुँजीबजारमा अन्यौल, अनिश्चितता र विदेशी तथा स्वदेशी लगानीमा गिरावट आउने ठहर गरेको छ।
इप्पानले भनेको छ, एउटै ISIN नम्बर प्रणालीका कारण बजारमा तरलता कायम छ, तर छुट्टाछुट्टै नम्बर राखेमा बजारमा गम्भीर संकट निम्तिन सक्छ। यसले सरकारको पुँजीगत लाभकर तथा ब्रोकर कम्पनीहरू र नेप्सेको कमिसन आम्दानीमा समेत गिरावट ल्याउने इप्पानको दाबी छ।
ऊर्जा क्षेत्रमा मात्र हाल ४७ आयोजनाअन्तर्गत ५३ अर्ब रुपैयाँका ५३ करोड कित्ता शेयर प्रभावित हुने देखिएको छ। ५८ उद्योगका ८७ अर्ब बराबरका शेयर लकिङ पेरियडमा रहेकाले पनि प्रतिकूल असर पर्ने इप्पानले जनाएको छ।
इप्पानले सिडिएससीको प्रस्तावलाई गैरकानुनीसमेत भनेको छ र यसले लगानीकर्ता गुमाउने, स्टार्टअप, पर्यटन, स्वास्थ्य, पूर्वाधार, भेन्चर क्यापिटल लगायत क्षेत्रमा असर पर्ने उल्लेख गरेको छ।
सरकारको १० वर्षभित्र २८,५०० मेगावाट विद्युत उत्पादन गर्ने लक्ष्य र ६१ खर्ब रुपैयाँको लगानी योजनामा समेत यस प्रस्तावले असर पार्ने इप्पानको भनाइ छ।
इप्पानले अर्थ मन्त्रालय, धितोपत्र बोर्ड र नियामक निकायहरूलाई तत्काल हस्तक्षेप गरी प्रस्ताव फिर्ता गराउन आग्रह गरेको छ।
