काठमाडौं । संचालनमा रहेका २० वाणिज्य बैंक मध्ये १४ वटा वाणिज्य बैंकले साउन महिनाको लागि मुद्दती निक्षेपको अधिकतम ब्याजदर घटाएका छन् । ४ वटा बैंकले मुद्दती निक्षेपको अधिकतम ब्याजदर स्थिर राख्दा २ वटाले भने मुद्दती निक्षेपको ब्याजदर सामान्य घटाएका छन्।
साउन महिनाको लागि मुद्दती निक्षेपको अधिकतम ब्याजदर घटाउने बैंकमा नेपाल बैंक, कृषि विकास बैंक, कुमारी बैंक, नेपाल एसबिआई बैंक, सानिमा बैंक, सिटिजन्स बैंक, लक्ष्मी सनराइज बैंक, नेपाल इन्भेष्टमेन्ट मेगा बैंक, नबिल बैंक, प्राइम बैंक, एनआईसी एशिया बैंक, एभरेष्ट बैंक, राष्ट्रिय वाणिज्य बैंक र प्रभु बैंक रहेका छन् । जस मध्ये प्रभु बैंकले सर्वाधिक १.८५ प्रतिशत बिन्दुले ब्याजदर घटाएको छ। अब प्रभु बैंकले व्यक्तिगत मुद्दतीमा अधिकतम ४.२५ प्रतिशत ब्याज दिने छ भने संस्थागत मुद्दतीमा अधिकतम ३.२५ प्रतिस्शत ब्याज दिने छ। प्रभु बैंकको व्यक्तिगत मुद्दतीको अधिकतम ब्याज ५ प्रतिशत भन्दा तल पुगेको हो। अरु सबै बैंकको व्यक्तिगत मुद्दतीको ब्याज ५ प्रतिशत भन्दा माथि नै छ।
साउन महिनाको लागि ब्याजदर स्थिर राख्ने बैंकहरुमा माछापुच्छ्रे बैंक, ग्लोबल आईएमइ बैंक, सिद्धार्थ बैंक र एनएमबि बैंक रहेका छन् । स्ट्याण्डर्ड चार्टर्ड बैंक र हिमालयन बैंकले भने मुद्दती निक्षेपको अधिकतम ब्याज बढाएका छन् । स्ट्याण्डर्ड चार्टर्ड बैंकले व्यक्तिगत मुद्दतीको अधिकतम ब्याज ६.२५ प्रतिशतबाट बढाएर ६.२६ प्रतिशत पुर्याएको छ। संस्थागत मुद्दतीको अधिकतम ब्याजदर भने ३ प्रतिशतमा स्थिर छ।
त्यस्तै हिमालयन बैंकले व्यक्तिगत मुद्दतीको अधिकतम ब्याजदर ५.५ प्रतिशतबाट बढाएर ६ प्रतिशत पुर्याएको छ। त्यस्तै संस्थागत मुद्दतीको अधिकतम ब्याज ४ प्रतिशतबाट बढाएर ५ प्रतिशत पुर्याएको छ। साउन महिनाको लागि व्यक्तिगत मुद्दती निक्षेपमा वाणिज्य बैंकहरुले तोकेको अधिकतम ब्याजदर औसतमा ५.६९ प्रतिशत रहेको छ। असारमा व्यक्तिगत मुद्दती निक्षेपमा वाणिज्य बैंकहरुले तोकेको अधिकतम ब्याजदर औसतमा ५.९० प्रतिहत थियो । अर्थात् साउनको लागि वाणिज्य बैंकहरुले मुद्दती निक्षेपको अधिकतम ब्याजदर ०.२० प्रतिशत बिन्दुले घटाएका छन् ।
वाणिज्य बैंकहरुले साउनको लागि तोकेको संस्थागत निक्षेपतर्फको अधिकतम औसत ब्याज भने ४.११ प्रतिशत रहेको छ। जुन असार महिनाको तुलनामा ०.२६ प्रतिशत बिन्दुले कम हो।
